Error
ADPU-nun rektoru professor Cəfər Cəfərov payız semestrinin imtahan sessiyasında yüksək ümumi orta müvəffəqiyyət göstəricisi (ÜOMG) qazanaraq adlı təqaüdə layiq görülən və universitetin ictimai həyatında fərqlənən, həmçinin Heydər Əliyev Mərkəzinin fəaliyyətində və COP29-un təşkilində yaxından iştirak edən könüllü ADPU tələbələrinin bir qismi ilə görüşmüşdür.
Ümumilikdə 100 nəfərədək tələbənin iştirakı ilə keçirilən görüşdə ADPU-nun rektoru professor Cəfər Cəfərov, tədris işləri üzrə prorektor dosent Eldar Aslanov, Elm və innovasiyalar üzrə prorektor professor Asəf Zamanov, Sosial və humanitar məsələlər üzrə prorektor professor Fikrət Rzayev, Tədbirlərin təşkili və tələbələrlə iş şöbəsinin müdiri Turan Kərimli və İctimaiyyətlə əlaqələr və marketinq şöbəsinin müdiri Taleh Mirzəyev iştirak etmişlər.
Görüşü giriş sözü ilə açan rektor Cəfər Cəfərov iştirakçıları qarşıdan gələn Novruz və Ramazan bayramları, həmçinin imtahan sessiyasında yüksək nəticə göstərən tələbələri adlı təqaüdlərə layiq görülmələri münasibətilə təbrik etmişdir. ADPU tələbələrinin daim həm akademik, həm də ictimai fəallıqları ilə seçildiyini qeyd edən rektor tələbələrin təhsildə qazandıqları nailiyyətlərin, elmi və sosial fəaliyyətlərdə göstərdikləri fəallığın universitetin ümumi inkişafına töhfə verdiyini vurğulamışdır.
Daha sonra professor Cəfər Cəfərov Elm və Təhsil Nazirliyi və Azərbaycan Təhsil İşçiləri Azad Həmkarlar İttifaqı Respublika Komitəsinin birgə təşkilatçılığı ilə ali təhsil müəssisələrinin tələbələri arasında keçirilən, Ümummilli Lider Heydər Əliyevin anadan olmasının 101-ci ildönümünə həsr olunmuş bədii yaradıcılıq müsabiqə-festivalında fərqlənən tələbələrə diplomlar təqdim etmişdir.
Səmimi söhbət və fikir mübadiləsi formasında davam edən görüşdə tələbələri maraqlandıran suallar rektor və prorektorlar tərəfindən cavablandırılmış, təkliflər dəyərləndirilmişdir.