Error
AMEA-nın Mərkəzi Elmi Kitabxanasında Türkiyə Cümhuriyyətinin və Şimali Kipr Türk Respublikasının dövlət himni “İstiqlal marşı”nın qəbul olunmasının 104-cü ildönümü münasibətilə “İstiqlalımız əbədidir!” mövzusunda tədbir keçirilmişdir.
AMEA-nın Nizami Gəncəvi adına Ədəbiyyat İnstitutunun, AMEA-nın Mərkəzi Elmi Kitabxanasının və Mahmud Kaşğari adına Beynəlxalq Fondun təşkilatçılığı, Türkiyənin Azərbaycandakı Səfirliyinin dəstəyi ilə baş tutan tədbirdə AMEA-nın prezidenti, Nizami Gəncəvi adına Ədəbiyyat İnstitutunun direktoru akademik İsa Həbibbəyli, Mahmud Kaşğari adına Beynəlxalq Fondun prezidenti, millət vəkili Cavanşir Feyziyev, Türkiyə Respublikasının ölkəmizdəki fövqəladə və səlahiyyətli səfiri Birol Akgün, Şimali Kipr Türk Respublikasının Bakıdakı nümayəndəliyinin rəhbəri Ufuk Turganer, ADPU-nun Beynəlxalq əlaqələr üzrə prorektoru professor Mahirə Hüseynova, prorektorluğun nəzdində fəaliyyət göstərən Türkoloji Mərkəzin Türk ədəbiyyatı bölməsinin müdiri professor Elman Quliyev, Filologiya fakültəsinin Müasir Azərbaycan dili kafedrasının müdiri dosent Könül Səmədova, millət vəkilləri, elmi ictimaiyyət və media nümayəndələri iştirak etmişlər.
Tədbir iştirakçıları əvvəlcə Ədəbiyyat İnstitutunda Mehmet Akif Ərsoy adına Türkiyə Ədəbiyyatı Mərkəzini ziyarət etmiş, Mərkəzin fəaliyyəti ilə tanış olmuşlar.
Tədbir Türkiyə Cümhuriyyətinin və Şimali Kipr Türk Respublikasının “İstiqlal marşı” və Azərbaycan Respublikasının Dövlət Himninin səsləndirilməsi ilə başlamışdır.
Akademik İsa Həbibbəyli, Türkiyənin ölkəmizdəki səfiri Birol Akgün, Azərbaycanda Atatürk Mərkəzinin direktoru akademik Nizami Cəfərov, ETN Riyaziyyat və Mexanika İnstitutunun direktoru AMEA-nın müxbir üzvü Misir Mərdanov, AMEA-nın Dilçilik İnstitutunun direktoru professor Nadir Məmmədli, professor Mahirə Hüseynova, Əməkdar jurnalist, filologiya elmləri doktoru Qulu Məhərrəmli, professor Elman Quliyev, “Şərq” qəzetinin baş redaktoru Akif Aşırlı, “Ədəbiyyat qəzeti”nin baş redaktoru Azər Turan, Azərbaycan Jurnalistlər Birliyinin sədri Elçin Şıxlı və başqaları çıxış edərək “İstiqlal marşı”nın Türkiyə Cümhuriyyətinin Qurtuluş savaşındakı rolundan, istiqlal şairi Mehmet Akif Ərsoyun yaradıcılığından bəhs etmişlər.