Füzulinin həyat və yaradıcılığının tədrisinə dair yeni kitab nəşr olunmuşdur.
Azərbaycan Respublikasının Prezidenti cənab İlham Əliyevin imzaladığı “Dahi Azərbaycan şairi Məhəmməd Füzulinin 530 illiyinin qeyd edilməsi haqqında” Sərəncamdan irəli gələn vəzifələrin həlli istiqamətində Azərbaycan Dövlət Pedaqoji Universitetinin Elmi Şurasının qərarı ilə “Məhəmməd Füzulinin həyat və yaradıcılığının ümumtəhsil məktəblərində tdrisinə dair” adlı dərs vəsaiti nəşr olunmuşdur.
Yeni nəşrin həmmüəllifləri füzulişünas alim, filologiya elmləri doktoru, professor Lalə Əlizadə və ədəbiyyatşünas, filologiya elmləri doktoru, dosent Əzizağa Nəcəfzadə, elmi redaktoru və ön sözün müəllifi ADPU-nun Beynəlxalq əlaqələr üzrə prorektoru, filologiya elmləri doktoru, professor, Azərbaycan Respublikasının Əməkdar müəllimi, Beynəlxalq Elmlər Akademiyası, Dünya “Söz” Akademiyası və Turan Elmlər Akademiyasının akademiki Mahirə Hüseynova, rəyçiləri Beynəlxalq Elmlər Akademiyasının akademiki, filologiya elmləri doktoru, professor Vüqar Əhməd, ADPU-nun Filologiya fakültəsinin dekanı filologiya üzrə fəlsəfə doktoru, dosent Könül Həsənova və Xaçmaz şəhər A.Səlimov adına 7 saylı tam orta məktəbin Azərbaycan dili və ədəbiyyat müəllimi Vüsalə Cəlilovadır.
Dahi Azərbaycan şairi Məhəmməd Füzulinin həyat və yaradıcılığının ümumtəhsil məktəblərində tədrisinin üsul və vasitələrinin araşdırıldığı vəsait ali məktəblərin Filologiya fakültəsi və ümumtəhsil məktəblərində Füzuli yaradıcılığının tədrisi istiqamətində elmi-metodik məzmunu ilə səciyyələnir.
“Elm və təhsil” nəşriyyatında işıq üzü görən dərs vəsaitində Məhəmməd Füzuli irsinə müasir pedaqoji yanaşma, ümumtəhsil məktəblərində şairin əsərlərinin tədrisi yolları və ondan istifadə texnologiyaları, orta məktəbin aşağı sinif Ədəbiyyat dərsliklərinə də Füzuli yaradıcılığının bədii nümunələrinin daxil edilməsi kimi aktual məsələlər müzakirə predmetinə çevrilmişdir.
“Məhəmməd Füzulinin həyat və yaradıcılığının ümumtəhsil məktəblərində tədrisinə dair” adlı dərs vəsaitinin üz qabığındakı Füzuli portretinin müəllifi Xalq rəssamı Əzim Əzimzadədir.