Qeyrət təcəssümü
2016-cı il döyüşləri zamanı cəbhədə ağır itkilər verən mənfur düşmənlər, keçmiş təmas xətti boyunca atəşkəsi pozur, postlarla yanaşı, dinc əhalini atəşə tutmağa cəhdlər göstərirdi. Düşmənin bütün cəhdlərinin qarşısı qətiyyətlə alınır, müdafiə xəttində təhlükəsizlik məqsədi ilə mühəndis-istehkam işləri görülürdü.
Məhz həmin döyüş tapşırıqlarından birinin yerinə yetirilməsi zamanı – düşmən təxribatının qarşısı alınarkən, kapitan Toğrul Məmmədov 2016-cı ilin iyulun 14-ü Ağdam cəbhəsində şəhid olmuşdu.
Şəhid Toğrul Məmmədov haqqında yazılmış “Qeyrət təcəssümü” kitabını vərəqləyərkən onun kiçik yaşlarında anasını, sonra isə atasını itirdiyini şahidi oluruq. Toğrul Məmmədov əvvəl ailənin yükünü, təəssübünü çəkən oğul kimi yüksəlmiş, sonra isə ən ali məqama vətəni uğrunda canından keçən şəhidlik mərtəbəsinə ucalmışdır.
Azərbaycan xalqı da əziz oğlunu, ölməz şəhidinin xatirəsini əbədiləşdirmiş, ona məqalələr, kitablar, təhsil aldığı hərbi məktəbdə tədbirlər keçirilmişdir.
26-27 may 2023 tarixində Naxçıvan Dövlət Universitetinin Kavkaz Universiteti (Türkiyə), İKSAT (Türkiyə) ilə birgə keçirtdiyi I Beynəlxalq İpək Yolu Konfransında da Toğrul Məmmədov yad edilmiş, şəhidin qardaşı Üzeyir Məmmədov ona həsr olunmuş “Qeyrət təcəssümü” kitabını ADPU-nun Beynəlxalq Əlaqələr üzrə prorektoru, professor Mahirə Hüseynovaya təqdim etmişdir. Mahirə Hüseynova Toğrul Məmmədov timsalında bütün şəhidlərimizin qarşısında baş əydiyini söyləmiş, dövlət başçımız cənab İlham Əliyevin, birinci vitse prezident Mehriban Əliyevanın şəhidlərin xatirələrinin əbədiləşdirilməsi, yaxınlarına yürütdüyü dövlət qayğısından, şəhidlik məqamının aliliyindən söhbət açmışdır:
“...Düşmənlərin Ağdam istiqamətində törətdikləri təxribatların qarşısını alarkən qəhrəmanlıqla həlak olan Toğrul Məmmədov büründüyü üçrəngli bayrağımızın və uğrunda qurban getdiyi torpağımızın müqəddəsliyini qorudu. Qorudu ki, Azərbaycanın müstəqilliyi əbədi olsun. Dünya dövlətləri arasında sayılıb-seçilsin. Adı daim yüksəklərdə səslənsin”.
Həqiqətən də, tarixin hansısa səhifəsini vərəqləyib bir xalqın taleyinə yazılmış qəhrəmanlıq salnaməsinə diqqət yetirdikdə dəyişməyən bir həqiqətin şahidi olursan. İnsanlarda anadangəlmə hiss, duyğu olan, nəyinsə, kiminsə naminə canından belə keçmək cəsarəti, məqamı yetişəndə başqalarından fərqli xüsusiyyət mütləq özünü büruzə verir. Milli mənsubluğuna görə fərqlənən bu keyfiyyət insanın daxili gücünün, qətiyyətinin, bəzən də barışmazlığın, ədalətsizliyə qarşı mübarizliyin nümunəsi, məkanı isə müqəddəs sayılan şəhidlik zirvəsi olur.