ADPU-da Türkoloji Mərkəz və “Ziyalı Ocağı” İctimai Birliyinin təşkilatçılığı ilə “Türk dünyası - köklər, budaqlar və aydın sabahlar” adlı beynəlxalq konfrans keçirilmişdir

Türkoloji Mərkəzin direktoru fil.ü.f.d. Şəkər Məmmədova konfransı giriş nitqi ilə açmış, Azərbaycan Respublikası Prezidenti cənab İlham Əliyevin “Azərbaycan ailəsi türk dünyasıdır” fikrini xatırlatmış, Azərbaycan, Türkiyə və Özbəkistanın elm, mədəniyyət adamlarının tədbirdə iştirak etdiyini bildirmişdir.

ADPU-nun Beynəlxalq əlaqələr üzrə prorektoru prof. Mahirə Hüseynova çıxış edərək türk xalqlarının dil, mədəniyyət baxımından bir-birinə yaxınlığını vurğulamış, konfransın əsas mövzusunun soykökünə bağlılıq, xalqlarımız arasında əsrlərdən boyu gələn qardaşlıq ənənələrinin, yaxınlığın daha da inkişaf etdirilməsi, parlaq gələcəyə inam, etibar prinsipləri olduğunu bildirmişdir.

 “Ziyalı Ocağı” İctimai Birliyinin sədri İlahə Bayındır, Özbəkistan Respublikasının Xalq artisti Gavhar Matyakubova, Özbəkistan Dövlət Xareoqrafiya Akademiyasının dosenti, Özbəkistan Dövlət Milli Teleradio Kompaniyasının baş redaktoru fil.e.d. Gulkar Hamrayeva, Dünya Uyğur Yazarlar Birliyinin prezidenti, yazıçı Abduşükür Muhammed, Türkiyə Yazarlar Birliyinin üvzü, şair Yaşar Aydın çıxış edərək türk dünyası dövlətlərinin kökləri, qardaş ölkələr arasında milli-mədəni əlaqələr barədə fikirlərini bildirmiş, müxtəlif şeirlər səsləndirmişlər.

Konfransın bədii hissəsində Özbəkistandan gələn rəqqas Risolat Sapayeva özbək milli rəqsini nümayiş etdirmişdir.

Konfransda prof. Mahirə Hüseynova türk dünyasında elmi və mədəni xidmətlərinə görə beynəlxalq mükafatla təltif olunmuşdur.

© 2024Filologiya.az. Bütün Hüquqlar qorunur