Tələbə təşkilatlarının forumu
21 sentyabr 2023 - cü il tarixində Azərbaycan Dövlət Pedaqoji Universitetinin böyük zalında Filologiya fakültəsinin təşkilatçılığı ilə tələbə təşkilatlarının forumu baş tutub. Görüşdə Filologiya fakültəsinin elmi işlər üzrə dekan müavini, f.ü.f.dok. Könül Həsənova, təşkilat rəhbərləri və Filologiya fakültəsinin l kurs tələbələri iştirak etdilər.
Error
F.ü.f.dok. Könül Həsənova başda olmaqla zalda iştirak edən bütün tələbələr ilk növbədə müzəffər Azərbaycan ordusunun antiterror əməliyyatlarında canını Vətən uğrunda fəda etmiş şəhidlərimizi bir dəqiqəlik sükutla yad etdilər. Daha sonra Filologiya fakültəsinin uğurlarından danışan Könül Həsənova qeyd etdi ki, bu gün də Filologiya fakültəsi yeni tələblərini qarşılayır. Bu tələbələrin hər biri ölkəmizin gələcəyi, fakültəmizin gələcək uğurlarıdır. Sonda ictimai fəaliyyətin tələbələr üçün əhəmiyyətindən danışaraq sözü tələbə təşkilatlarına verdi.
Çıxış üçün söz Meh Ədəbi Dərnəyinin rəhbəri, Raman İsmayılova verildi. O, Meh Ədəbi Dərnəyinin məqsədi, fəaliyyət və uğurları haqqında ətraflı məlumat verərək bildirdi ki, 2019 -cu ildə ADPU -nun Beynəlxalq əlaqələr üzrə prorektoru, Filologiya fakültəsinin dekanı v.i.e, prof. Mahirə Hüseynovanın təşəbbüsü ilə yaradılan Meh Ədəbi Dərnəyi ölkə və dünya miqyasında böyük layihə və tədbirlər həyata keçirmiş, uğurlar əldə etmişdir. Daha sonra Meh Ədəbi Dərnəyi barədə videoçarxın nümayiş olunması ilə çıxışını yekunlaşdırdı.
Daha sonra söz ADPU UNECSO klubunun prezidenti Əhməd Babaşova verildi. Beynəlxalq təşkilat olan UNESCO - nun fəaliyyətləri barədə məlumat verən Əhməd burada tələbələr üçün yaradılan şəraiti diqqətə çatdıraraq UNESCO haqqında hazırlanmış videoçarxı təqdim etdi.
ADPU Yeni Klub barədə isə klubun rəhbəri İsmayıl Nəsirov çıxış edərək, yeni fəaliyyətə başlayan klubun fəaliyyətlərindən və imkanlarından söz açdı.
Tədbirin davamında söz Tələbə Gənclər Təşkilatının sədri Təhmasib İmaməliyevə verildi. ADPU TGT - nin fəaliyyəti, strukturu və uğurları barədə geniş məlumat verən T. İmaməliyev qeyd etdi ki, gənclərin ictimai fəaliyyətinin artırılması və asudə vaxtlarının səmərəli təşkil edilməsi məqsədi ilə yeni layihələr həyata keçiriləcəkdir.
ADPU ENACTUS barəsində isə komandanın prezidenti Şahin Məmmədli məlumat verərək beynəlxalq layihə olan ENACTUS - un gənclərin biznes və sahibkarlıq ideyalarının reallaşdırılması üçün böyük fürsət olduğunu diqqətə çatdıraraq komandanın uğurlarını xüsusilə vurğuladı.
Daha sonra söz ADPU Təhsil Könüllüləri Tələbə Birliyinin sədri Nərgiz Quluzadəyə verildi. O, şagirdə tələbə dəstəyi və tələbəyə tələbə dəstəyi ideyaları ilə çıxış edən ADPU TKTB - nin fəaliyyətlərini diqqətə çatdıraraq gənclər üçün yaradılmış səmimi ortam və onların inkişafı üçün hazırlanmış layihələr barədə danışdı.
ADPU Tələbə Həmkarlar İttifaqı Komitəsi haqqında isə təşkilatın sədr müavini Cəmilə Qurbanova məlumat verərək burada tələbələrin maddi imkanına dəstək olmaq üçün çoxlu işlər görüldüyünü və təşkilatın üzvlərinin çoxlu uğurlar əldə etdiyini diqqətə çatdırdı.
Sonda isə Meh Ədəbi Dərnəyinin üzvü Əlibəy Ələkbərli tələbələrlə öz səmimi fikirlərini bölüşərək onlara uğurlar arzu etdi. Sonda qiraətçi Cəmilə Məmmədovanın ifasında Mahirə Nağıqızının "Mən səni özüm kimi" şeirinin səsləndirilməsi ilə tədbir başa çatdı.